Casteddu - “Cagliari città capitale: scenari e prospettive per uno sviluppo sostenibile e per il lavoro” est su tema de s'addòviu-dibàtidu ammaniadu pro giòvia su 7 de maju dae sos assòtzios "Sardegna Sostenibile e Sovrana" e "Terra Pace e Solidarietà". S'apuntamentu est pro sas 5 e mesa de borta de die (h 17,30) in sa sala de s'ExArt (ex Litzeu Artìsticu) in pratza de Dettori 9 in Casteddu.
A su dibàtidu (introduidu dae Roberto Mirasola e coordinadu dae Vito Biolchini) at a leare parte su Segretàriu generale de sa Cgil de Casteddu Carmelo Farci, s'espertu de polìticas ativas de su traballu Mauro Tuzzolino, Clàudia Cannas de sa Confesercenti e su cussigeri comunale Enrico Lobina (Sardegna Sovrana). «Sos temas de s'isvilupu e de su traballu sunt cullegados intre issos: non bi podet èssere traballu sena isvilupu e no est possìbile mancu su contràriu. Est netzessàriu però de crarire cale modellu de isvilupo tocat de sighire.
Oe est de importu a sustènnere unu modellu chi siat sustenìbile, est a nàrrere chi siat a tretu de pònnere a su tzentru s'amparu de s'ambiente, de sa salude e sa calidade de sa vida» ant sutaliniadu sos organizadores.
S'assòtziu "Sardegna Sostenibile e Sovrana", paris cun sa cumponente consiliare Sardegna Sovrana in su Cussìgiu comunale de Casteddu, at incumintzadu una discussione subra de sos temas de sa tzitade in s'àmbitu de su progetu Agenda 2019, cando in su 2016 b'ant a èssere sas eletziones de su Cussìgiu comunale e s'eletzione de su Sìndigu nou de sa capitale sarda.
S'addòviu de giòvia est duncas su primu de unos cantos, chi tenet comente tema printzipale "Casteddu tzitade capitale" e chi de seguru nd'ant a leare parte finas àteros assòtzios chi traballant in tzitade e in s'àrea vasta.

In sa foto: Vito Biolchini