Casteddu - In sa Biblioteca regionale de arburada de Trieste, si sunt abertas in Casteddu sas tzerimònias de sa Die de sa Sardigna cun sa presentada de su segundu volùmene de s'òpera intitulada “Giovanni Spano e i suoi corrispondenti”, iscritu dae Luciano Carta e publicadu dae sas editziones Ilisso cun su contributu de sa Fondatzione Siotto Pintor. Comente at naradu s'assessora regionale de sa Cultura, Clàudia Firino «Amus chertu fàghere un'initziativa unu pagu diferente dae su tempus coladu pro permìtere a sos sardos de si torrare a impossessare de custa Die. Su ligàmene de totu custas initziativas de su 2015 est su pensamentu subra de su 28 de abrile de su 1794, su significu de s'autonomia nostra e de s'istòria nostra cheret torradu a lèghere abbaidende sa situatzione polìtica, econòmica e sotziale de oe. Custu volùmene donat a totus unu patrimòniu mannu e de valore dae unu puntu de vista culturale e identitàriu ca collit unu traballu difìtzile e articuladu subra de s'epistolàriu de su canònicu Spano cun pessonàgios meda de s'Otighentos, intre de custos Alberto Della Marmora e Carlo Baudi di Vesme». Unu ligàmene de importu intre Sardigna e Piemonte, belle in controtendèntzia cun sos fatos de su 28 de abrile de su 1794.

Su traballu de s'autore, incumintzadu in sos annos Otanta, at a agabbare intro de su 2015 cun sa pubblicatzione de sos àteros bator volùmenes de s'òpera. A pustis de sa presentada, est istada projetada sa pellìcula “Nodas: launeddas in tempo di crisi”, a incuru de Andrea Mura e Umberto Cao in collaboratzione cun s'assòtziu S’Iscandula.