Casteddu - Un'ingegnieri giòvanu de s'Universidade de Casteddu s'est classificadu su de tres in sa segunda editzione de “Think Green, Be Efficient!”, s'ùnica cumpetitzione natzionale riservada a tesis de làurea subra de sos temas de s'efitzièntzia energètica promòvida dae Enea, Schneider Electric, Kyoto Club e Ensiel (unu cunsòrtziu universitàriu in ue Unica est cumponente). Si tratat de Nigola Tore, chi at presentadu sa tesi “Progetto di un sistema domotico per la massimizzazione dell’autoconsumo in ambito residenziale”, su reladore est su professore Fabrizio Pilo, dotzente ordinàriu de Sistemas Elètricos pro s’Energia de s'Ateneu de Casteddu. Sa premiatzione est istada in Roma sas dies coladas, in sa sede de Enea.
A su cuncursu, patrotzinadu dae sos Ministeros de s'Ambiente e de s'Isvilupu Econòmicu, ant leadu parte 50 tesis de làurea de istudentes de sas facultades de Ingegneria o de Architetura de 22 Universidades de Itàlia.