Casteddu - Maria Del Zompo est sa prima fèmina retora in s'istòria de s'Universidade de Casteddu, chi finas a como at àpidu sessanta òmines in su ruolu de "magnìficu". Sa dotzente de Farmatzeologia, at àpidu 825 votos, contra 212 de su professore Giacomo Cao.
Casteddaja, sa professora Del Zompo at a cròmpere in su mese de abrile 64 annos. A pustis de èssere devènnida chircadora in su 1980, at fatu prus de duos annos in sa “Biological Psychiatry Branch” de su “National Institute of Mental Health”, in Bethesda (in sos Istados Unidos), collaborende cun John Tallman in suta de sa diretzione de Robert M.Post. Est professora ordinària de Farmacologia in su cursu de làurea de Meighina e Chirurgia, diriget su dipartimentu prus mannu de s’Ateneu, Neurosièntzias, a pustis de àere diretu su Dipartimentu de Neurosièntzias “B.B.Brodie”. S'atividade clìnica sua la faghet in s'Unidade cumplessa de Farmacologia clìnica in s'ispidale San Giovanni di Dio, un'istrutura dedicada a carchi patologia in s'àmbitu de sas neurosièntzias clìnicas, comente sa maladia bipolare e s’emicrània.

In sa foto: Maria Del Zompo