Tàtari - Sunt galu abertas sas iscritziones pro leare parte a su cuncursu "Fiorenzo Serra" pro produtziones fìlmicas de caràtere etnogràficu, promòvidu dae su Laboratòriu de Antropologia Visuale Fiorenzo Serra, istituidu dae su Dipartimentu de Istòria, Sièntzias de s'Òmine e de sa formtzione de s'Universidade de Tàtari, in cunventzione cun sa Sotziedade Umanitària - Tzinetèca sarda. Su tema isseberadu dae sos organizadores pro custa prima editzione de su cuncursu est "Sas traditziones de sa Chida Santa".

Sa partetzipatzione de sos autores est de badas e lìbera, sena lìmites de edade e de natzionalidade. Podent cuncùrrere totu sos produtos audiovisivos, professionales e non professionales, editos e inèditos, girados in cale si siat parte de su mundu, sena lìmites de annu de produtzione, finas si ant leadu parte a àteros cuncursos, festival e rassignas, chi pertochent però sa Chida Santa.
Sos filmados, chi durant non prus de 60 minutos, ant a pòdere èssere produidos e criados in cale si siat formadu e suportu.
Pro leare parte a su cuncursu est obrigatòriu a imbiare sa pellìcula in formadu dvd o blu-ray disc. S'iscadèntzia pro sa presentatzione de sa pellìcula e de sa documentatzione chi serbit est su 15 de cabudanni de su 2015. Su primu classificadu at a retzire unu prèmiu de 5 mìgia èuros; su segundu at a leare 3 mìgia èuros, mentres su de tres at a bìnchere milli èuros. Pro àteras informatziones, si podet abbaidare su situ internet de s'Anvisuals.