Casteddu - Medas capannones industriales, unu laboratòriu chìmicu, carchi edifìtziu: un'àrea manna belle deghe ètaros in Machiareddu est istada secuestrada dae sos agentes de su Corpus forestale de Cabuderra. Faghet pessare meda s'àrea de sa ex Dicovisa, tancada in sos annos Otanta e a pustis dada a una sotziedade de Milanu.

Segundu su chi ant cumproadu sos òmines de sa Forestale s'azienda est istada ismantellada, paret chi siant istadas leadas sas atretzaduras e su chi bi fiat de valore in sos capannones ma sunt istados abbandonados sos refudos e finas ògios combustìbiles e àteras sustàntzias in parte perigulosas, calicuna de custas est arribada a su terrinu. Su materiale, imbetzes, deviat èssere bogadu a fora.
Su nùmene de su rapresentante legale de sa dita de Milanu (finas a su 2013) est istadu iscritu in su registru de sos indagados: a issu benint cuntestadas violatziones ambientales in matèria de ismaltimentu de refudos. A s'agabbu de sos atzertamentos, b'at partetzipadu su personale de s'Arpas, est istada presentada una relatzione in Procura chi at batidu a su secuestru preventivu de totu s'àrea.

In sa foto sa zona de Machiareddu