Casteddu - S'Assessore de su Turismu, Artigianadu e Cummèrtziu, Frantziscu Morandi, est istadu nominadu cumponente de su Comitadu permanente pro sa promotzione de su turismu in Itàlia, in rapresentàntzia de sas Regiones. Su Comitadu at a èssere numenadu cras dae su Ministru de sos Benes e Atividades culturales e de su Turismu, Dàrio Franceschini, in ocasione de su de 13 Forum Europeu de su Turismu chi b'at a èssere in Nàpoli finas a su 31 de santugaine chi benit.
«Est de importu a crarire un'istrategia natzionale -afirmat s'assessore Morandi - chi siat a tretu de sebestare formas noas e modalidades de promotzione a s'èsteru, a manera chi in cust'àmbitu sas Regiones potzant espressare cun craresa su potentziale issoro. Sa Sardigna - at craridu s'assessore - cheret giogare unu ruolu de protagonista in s'àmbitu de su Coordinamentu turismu de sa Cunferèntzia de sas Regiones pro cumpartzire cun sa destinatzione Itàlia sas istrategias ùtiles a s'Ìsula pro si collocare in sos mercados internatzionales. Sa lìnia de atzione nostra - at naradu - est in sintònia perfeta cun cussa de sa Cunferèntzia, est a nàrrere chi b'est sa punna pro sighire formas noas de promotzione de s'oferta, s'innovatzione tecnològica in su setore turìsticu, sa semplificatzione amministrativa».



In sa foto s'assessore regionale Morandi