Tàtari - Est Maurìtziu Caristia su diretore generale nou de sa Comuna de Tàtari. Sa giunta comunale sas dies coladas, cun delìbera nùmeru 244, s'est espressada a manera favorevole pro su cunferimentu de s'incàrrigu, previdende unu cuntratu de tres annos, prorogàbile finas a sa durada màssima de su mandadu eletivu de su sìndigu. Su dirigente at a intrare in servìtziu dae su 17 de santandria, a pustis de su provedimentu de nòmina chi at a èssere emanadu dae su sìndigu.

S'issèberu de su dirigente arribat a pustis de un'iter incumintzadu in su mese de austu, cun sa publicatzione de un'avisu pro collire manifestatziones de interessu pro àere custu ruolu, pro ismanniare sa possibilidade de issèberu intre sas candidaduras. In custu perìodu ant presentadu in 48 su curriculum.

Classe 1954, Maurìtziu Caristia tenet un'esperièntzia longa de diretzione generale in duas Comunas capitales de provìntzia, Forlì e Màntova, sos ùrtimos deghe annos, duncas sa connoschèntzia de su problema de sos protzessos de organizatzione noa de sas aziendas partetzipadas e controlladas. In prus, su dirigente nou tenet un'esperièntzia professionale cualificada in s'àmbitu de sa gestione de sos servìtzios a sa pessone e de sos servìtzios pùblicos de trasportu locale.