Tàtari - Un'àula belle bòida e unu sìndigu cun sa giunta sua chi non bi fiant. Custu est su retratu de Palatzu Ducale in sa setziada de giòvia de su Cussìgiu comunale ma mescamente una sntesi "visiva" de sa fase polìtica tataresa. Unu periodu malu chi est durende dae meses, dae s'eletzione a su primu turnu de su sìndigu Nicola Sanna chi a pustis at numenadu un'esecutivu chi agradat pagu a sa majoria de su Partidu Democràticu chi nde faghet parte.
Unu grupu de 10 cussigeris democràticos chi, si bi fiat istada s'assemblea a manera regulare aiant de seguru protestadu in intro de s'àula detzidende de non votare e lassende sa riunione. Non sunt arribados a custu puntu ca su presidente Piu at isortu sa setziada ca non bi fiat su nùmeru legale a pustis de sos malumores de s'opositzione (ispiegadas a pustis in una cunferèntzia istampa).
Da un'àtera ala b'aiat un'àteru addòviu, cussu intre Sanna cun sos "rebelles", pro discùtere de nùmenes e de dèlegas. Subra de su primu puntu su sìndigu paret galu chi chèrgiat sighire a andare a dae in antis in su caminu suo e chi non cheret torrare in palas, ma subra de su segundu b'at carchi puntu de abertura. In su mentres su Cussìgiu est istadu torradu a cunvocare pro lunis. Isperende chi cussa at a èssere sa borta bona.