Tàtari – Est istadu publicadu sas dies coladas in su situ de sa Comuna de Tàtari s’avisu pùblicu pro sa manifestatzione de interessu pro s’incàrrigu de Diretore Generale de sa Comuna. Sa publicatzione sighit sa delìbera de Giunta comunale, in ue su sìndigu Nicola Sanna at espressadu sa voluntade de fàghere sa nòmina noa.In su documentu est ispetzificadu chi «su Diretore generale de s’Amministratzione comunale devet fàghere sas funtziones prevìdidas dae s’art. 18 de su Regolamentu de organizatzione de sos ufìtzios e de sos servìtzios e tenet s’incàrrigu in particulare de atuare sos indiritzos e sos obietivos istabilidos dae sos òrganos de guvernu de s’Ente, segundu sas diretivas dadas dae su Sìndigu, e pessat a sa gestione de s’Ente pessighende livellos otimales de eficàtzia e de efitzièntzia». Su raportu de traballu at a èssere reguladu cun cuntratu de deretu privadu a tempus determinadu de durada chi no at a èssere superiore a cussa de su mandadu eletivu de su primu tzitadinu in càrriga.