Casteddu – At a èssere inaugurada giòbia su 17 de trìulas a sas 7 de sero sa mustra fotogràfica “This Is Mirrionis”: chentuvinti fotografias de Casteddu chi contant sos bighinados perifèricos de Is Mirrionis e de Santu Micheli. Sa mustra, cuidada dae sa diretora de sos Mùseos Tzìvicos de Casteddu Annamaria Montaldo, torrat a sa tzitade su traballu de sos fotografos inglesos George Georgiu e Vanessa Winship, chi sunt in tiztade in intro de “Eureca!”, progetu de arte pùblica e partzipada postu in sa programmatzione de sos Museos pro sa candidadura de Casteddu Capitale Europea de sa Cultura 2019 e realizadu dae s’agentzia fotogràfica “Prospekt”.Sa mustra at a èssere presentada in antis de totus a sos giornalistas giòbia a sas 11 in sa Galleria de Arte, in sos Giardinos Pùblicos de Largo Giuseppe Dessì, in Casteddu. Ant a èssere presentes Enrica Puggioni, assessora comunale de sa Cultura, Anna Maria Montaldo, diretora Museos Tzìvicos, Claudio Jampaglia, Arianna Cocchi e Samuele Pellecchia de s’Agentzia Prospekt, sos fotografos George Georgius e Vanessa Winship.

(Foto di Vanessa Winship)