Tàtari – Prima setziada de su cussìgiu custu mangianu in Palatzu Ducale. Una sala prena de ispetadores, su sìndigu Nicola Sanna, sa giunta e sos cussigieris ant incumintzadu sa riunione a ora de sas 10.30.Trintachimbe sos cussigieris presentes, 24 de majoria e 11 de opositzione, chi ant leadu su logu in sas cadreas assinnadas. A pustis de sa proclamatzione de sos eletos in sas amministrativas de su 25 de maju, su sìndigu at giuradu e comunicadu a su cussìgiu sa compositzione de sa giunta, sa matessi de sa die de sa nòmina sua. «Torro gràtzias a sos tzitadinos e sutalìnio su respetu siat pro chie m’at votadu siat pro chie no l’at fatu » at naradu su sìndigu. “A chie sa die de sas votatziones no est andadu a votare naro chi b’at a èssere s’impinnu meu pro fàghere a manera chi potzant superare custu mamentu de fide paga pro sas istitutziones. Su cussìgiu comunale – at sighidu Sanna – est rennoadu finas dae unu puntu de vista generatzionale e est crèschida sa presèntzia de sas fèminas. Amus a mantènnere custu palatzu in cuntatu cun sa tzitade, s’obietivu nostru est a unire e no a partzire”. Sos cussigeris ant votadu finas pro s’eletzione de su presidente de su Cussìgiu: cun 26 votos subra de 35 est istadu elègidu Antoni Piu. Piu at naradu :“Est unu mamentu emotzionante a beru. Su meu at a èssere unu ruolu de garante chi non tenet partes polìticas e chi servit pro gestire mègius sos traballos de sa tzitade”. A s’agabbu de su cussìgiu su primu tzitadinu Nicola Sanna at faeddadu de sa situatzione de sas ùrtimas chidas chi pertocaiat sas polèmicas nàschidas dae ùndighi cussigeris de su Pd chi aiant criticadu sa nòmina de sa giunta e pedidu unu cunfrontu. “Amus fraigadu unu traballu de diàlogu e est cumintzadu unu mamentu de fide cuncambiada, non b’at àpidu mai duda subra de custu » at naradu Sanna. In custu argumentu est intervènnida finas Esmeralda Ughi, una de sos ùndighi cussigeris: “Est incumintzadu unu diàlogu, sos frutos de custu passu s’ant a bìdere sas dies chi ant a bènnere”.