Casteddu - Zaineddu in palas e gana meda de aventura, moet in custa manera mèrcuris su 2 de trìulas dae s'aeroportu de Casteddu su progetu sustènnidu dae s'assòtziu Diversamente Onlus “In cammino con l’autismo” pro sensibilizare s'opinione pùblica subra de s'atuatzione cuncreta de sa Carta de sos deretos pro sas pessones autìsticas.
Pierangelo Cappai, presidente de s'Assòtziu Diversamente Onlus, e fìgiu suo Federico de 12 annos, autìsticu a funtzionamentu bassu, a pustis de èssere arribados a Burgos, in su nord de s'Ispagna, ant a chircare de nche arribare a Santiago de Compostela. Mancari intre milli dificultades,tràmite su caminu antigu de sos viagiadores, babbu e fìgiu andant pro sensibilizare s'opinione pùblica subra de su deretu a una mobilidade sustenìbile e a sa libertade de movimentu finas pro sas pessones cun autismu. S'esperièntzia issoro at a èssere contada dae sos protagonistas in sa pàgina facebook "In Cammino con l’Autismo".