Casteddu - Sa Regione Sardigna no at firmadu su protocollu de intesa cun su Ministèriu de sa Defensa subra de sas servitudes militares, in ocasione de sa segunda Cunferèntzia natzionale subra de sas servitudes militares. Sa prima est istada fata 33 annos a como. Ministèriu de sa Defensa e Cunferèntzia de sas Regiones ant sutaiscritu unu documentu de intentos in matèria ma "sos tempos non sunt galu prontos - at naradu su guvernadore Pìgliaru - Dae meda tempus sos sardos protestant ma non benint ascurtados".
Su documentu est istadu firmadu, imbetzes dae sos guvernadores de sa Pùglia, Vèndola e de su Friuli Venètzia Giùlia, Serracchiani. Pìgliaru est pedende sa dismissione de sos Polìgonos de Cabu Teluada e de Cabu Frasca:"Nois amus su 65% de sas servitudes natzionales. Semus faeddende de 30 mìgia ètaros de territòriu e de 80 km de costa esclùdidos dae su turismu. Nùmeros mannos meda, chi non podimus bajulare prus".