Tàtari - Incumintzadas sas ripresas de sa pellìcula "Buon lavoro", segunda òpera de su regista Marco Demurtas, produtu dae Cinemascetti paris cun s'assessoradu a sas Polìticas sotziales de sa Comuna de Tàtari. Sas carreras de su Monte Rosello e de su tzentru istòricu de Tàtari e su parcu Lu Càntaru, ant a èssere su logu de unu "set" tzinematogràficu beru. S'eventu est una tapa fundamentale de unu progetu chi tenet ambitziones culturales e umanas de importu. Est una produtzione tzinematogràfica cun un'iscuadra fata mescamente dae giòvanos tataresos e realizada in intro de su laboratòriu de sotzializatzione a su traballu "Agorà film". Su progetu, nàschidu cun s'intentu de acurtziare a sos mestieris de su tzìnema sos giòvanos de sas comunas de Tàtari, Istintino e Portu Turre faghet parte de sos interventos de programmatzione sotziale de sos servìtzios a sa pessone.
Sa pellìcula est una commèdia surreale subra de su tema de su perìgulu de sos mèdios de comunicatzione. Ant leadu parte a custa initziativa medas assòtzios de sa provìntzia de Tàtari comente “Voce in musica”, “Up & Ddown”, “True colors”, “Wana tattoo”, “Iter teatro”, s'assòtziu isportivu “San Paolo”, "La combriccola dell’arte" e “La carovana” chi ant dadu unu contributu artìsticu de importu e dadu finas sos ispàtzios issoro pro sas ripresas.