TATARI - Mancant galu pagas dies pro su primu "ciak" de su film "Buon lavoro", su longu metràgiu diretu dae Marco Demurtas e produidu dae Cinemascetti, in collaboratzione cun s'Assessoradu a sas polìticas sotziales de sa Comuna de Tàtari. Pro sos giòvanos dischentes de su laboratòriu de orientamentu e sotzializatzione a su traballu AgoràFilm, ghiados dae sa teatroterapista Viola Ledda, est arribadu su mamentu de si cunfrontare in su campu cun professionistas beros de su tzìnema.

In s'iscuadra de sa pellìcula, produida cun Green Bubble, b'est su gràficu Daniele Frontini: binchidore de su Prèmiu Web Itàlia. "Buon lavoro" est una metàfora subra de su tema de su precariadu e de sos problemas cajonados dae Internet e miscrat gèneres diferentes comente su thriller e su fantasy apocalìticu. Sa pellìcula analizat sos efetos de su protagonismu televisivu e faeddat de unu reality subra de sos casos umanos.

A custu progetu ant a leare parte sos atores de s'Assòtziu Up & Down e at a èssere giradu mescamente in su monte Rosello. "Una zona sutavalutada ma chi tenet una vitalidade manna - at naradu Demurtas - cun s'istòria sua, in sas carreras suas e in sos pessonàgios e chi mi faghet torrare a conca sa tzinematografia neorealista".

Intre sos protagonistas de sa pellìcula, sos atores Carlo Valle, Michele Cocciu e Domenico Soggia. Pro chie est interessadu a retzitare sa Cinemascetti ammentat chi su 12 de maju dae sas 15 a sas 20, in sos locales de carrera de Giusti 2, b'ant a èssere sas auditziones pro atores o pro totu cussos chi bolent fàghere un'esperièntzia in unu set tzinematogràficu. Pro informatziones Cinemascetti@gmail.com o telefonare a su nùmeru 3477651981.