TATARI - Sa giunta regionale, a pustis de sa proposta de s'assessore Arru, at aproadu una delìbera chi previdet s'erogatzione de 93 milliones de èuros comente antìtzipu a sas Comunas pro totu sas atziones prevìdidas dae su Fundu regionale pro sa non "autosufficienza". S'assessore regionale a sa sanidade, Luigi Arru, at ispricadu chi " semus ponende remèdiu a carchi retardu chi amus agatadu. Semus aviende su finantziamentu de sos pranos noos "Ritornare a casa" e pro rennoare sos pranos chi sunt in iscadèntzia e semus ammaniende unu progetu orgànicu pro parare fronte a sas pessones cun disabilidade meda grave. In sas chidas imbenientes amus a traballare pro torrare a organizare sos interventos pro minimare sas protzeduras e pro assegurare unu finantziamentu seguru pro sas famìlias e sas Comunas".