Tàtari - Tàtari capitale natzionale de Erasmus pro tres dies paris finas a su 14 de làmpadas, in ocasione de sa segunda Piataforma natzionale 2015 de ESN-Itàlia – Erasmus Student Network, s'assòtziu chi cun 466 setziones europeas traballat cun sos ateneos pro retzire e integrare sos istudentes istràngios e pro promòvere Erasmus e sas mobilidades internatzionales de sos istudentes in sas universidades e in sas iscolas. Prus de 130 delegados in rapresentàntzia de sas 49 setziones italianas de ESN si sunt agatadas in Tàtari in s'albergu Grazia Deledda paris cun medas òspites internatzionales, pro leare parte a su cunvegnu peròdicu natzionale subra de Erasmus, custa bia ammaniadu dae sa setzione de ESN-Itàlia.
Est un'impinnu chi s'assòtziu tataresu at giutu a dae in antis cun passione, in collaboratzione cun s'Universidade de sos Istùdios de Tàtari, s'Ufìtziu Relatziones Internatzionales de s'Ateneu, cun su Patronadu de sa Comuna de Tàtari e su sustegnu de medas isponsorizadores.