Tàtari - Su retore de s'Universidade de sos Istùdios de Tàtari Màssimo Carpinelli e Francesca Casule de sa Subraintendèntzia pro sas artes bellas e su paesàgiu pro sas provìntzias de Tàtari e de Nùgoro (B.EA.P.) ant firmadu mèrcuris a mangianu unu Protocollu de Intesa pro sa supervisione de sos interventos de restàuru e manutentzione de sa sede istòrica de s'Ateneu in Pratza Universidade.
Su protocollu cunfirmat unu raportu de collaboratzione chi dae annos unit custas duas istitutziones e chi at giai dadu sos frutos suos in ocasione de àteros interventos de restàuru chi ant interessadu sos edifìtzios universitàrios.
S'Universidade at a tènnere sa funtzione de istatzione apaltante pro su finantziamentu de 11.945.000,00 euro chi sa Regione Sardigna l'at dadu "Infrastrutture strategiche regionali per la conoscenza", Fundu pro s'Isvilupu e sa Coesione FSC 2007-2013, chi derivant dae sa delìbera CIPE n. 78/2011, pro sa realizatzione de su protzedimentu "Ristrutturazione Palazzi Amministrazione Centrale Complesso Piazza Università - Edifici Piazza Università – Ex Estanco - Zirulia".

Sa Subraintendèntzia pro sas artes bellas e su paesàgiu de Tàtari e de Nùgoro at a esertzitare sa supervisione tècnicu-sientìfica in s'àmbitu de sos còmpitos istitutzionales suos e at a pònnere a disponimentu, personale meda cualificadu pro sa costitutzione de un'ufìtziu de Diretzione Traballos chi potzat sighire sos aspetos architetònicos, sientìficos e de restàuru, e finas su coordinamentu de sa seguresa in fase de esecutzione.

In sa foto: sa firma de su Protocollu