Otieri - Est Luana Farina, in arte Amantia Martinelli, sa sarda chi at bintu su Poetry Slam, sa gara de interpretatzione pro poetas cun testos suos inèditos, e sa finale regionale est istada fata in su Teatru Tzìvicu de Otieri su 22 de maju coladu, at a tènnere s'onore de rapresentare s'ìsula a sas Finales Natzionales chi ant a èssere a fine de su mese trìulas in su Festival "La Punta della Lingua di Ancona", intre sos primos tres festival de poesia in Itàlia a tempos de como. S'eventu est istadu ammaniadu dae sa Lips (Lega italiana Poetry Slam) Sardigna cun su patronadu de s'assessoradu a sa Cultura de sa Comuna de Otieri e de su Prèmiu Otieri de literadura e cun su contributu de sos isponsorizadores Athena Sardegna e La Dea Madre Viaggi. In dae in antis a meda pùblicu, sa poeta de orìgines otieresas at surpassadu s'aligheresu Innàtziu Chessa (rapresentante sardu a sas Finales Natzionales de su 2014). Su de tres postos est istadu leadu dae sa tataresa Roberta Cucciari Sanna (binchidora de su Prèmiu de sa Crìtica dadu dae sa giuria ispetziale costituida dae Alberto Masala, dae Clara Farina e dae su rapresentante de su Prèmiu de Poesia de Otieri Antoni Canalis ), mentres a su de bator postos s'est classificadu Alessandro Doro, semper dae Tàtari.
Sa finale est istadu s'ùrtimu atu de s'istajone 2014-2015 in ue s'iscena sarda s'est mustrada una de sas prus ativas in su panorama natzionale, arribende a 11 slam (Casteddu 3; S'Alighera 3; Otieri 2; Tàtari, Portu Turre, Piaghe 1 slam), su de bator coordinamentos in Itàlia pro cantitade de slam fatos, segundu setzi a su Làtzio- Campània, Lombardia e Piemonte- Ligùria.
A detzìdere su binchidore est istada, segundu sa règula de su Poetry Slam, sa giuria populare isseberada intre su pùblicu, chi at valutadu cada esibitzione de tres minutos, setzi cun boghe e corpus pro dare ànima a sos testos iscritos dae sos poetas matessi sena lìmite de tema, forma e limba. Sa manifestatzione at àpidu unu pròlogu, prelùdiu a sa finale, in sas carreras de sa tzitade cun s'isfilada poètica “Palabra en el Mundo” (Paràula in su Mundu) chi intre sas tapas diferentes b'at àpidu finas sa domo in ue est nàschidu su poeta otieresu Antoni Cubeddu, organizadore de sa prima gara poètica "a bolu" in su 1896.


In sa foto (de Tore Palita): Luana Farina