S'Alighera - Belle a sa fine de s'annu iscolàsticu e cun unu bellu sutzessu in teatru, sos istudentes de sos Litzeos Manno e Fermi lu podent nàrrere: «a giogare cun sos testos clàssicos est istadu un'ispàssiu». E tocat de bi crèere si su resurtadu est cussu bidu in iscena in s'"Aulularia" de Plàuto, in ue ant fatu rìere e emotzionare medas ispetadores chi ant assìstidu a tres rèplicas in sas chidas coladas.
Carchi protagonista contat in s'intervista a Alguer.it s'"esperièntzia" sua de atore. Est dae su 1996 chi su Litzeu Manno (in sos ùrtimos annos in sinergia cun sos àteros litzeos tzitadinos) giughet a dae in antis su laboratòriu teatrale cun sa cumpangia de s'istitutu, chi at detzisu de si mutire "I compagni di Luca", in ammentu de Luca Manchia, istudente de su Litzeu mortu giòvanu.

Medas sos reconnoschimentos e sas partetzipatziones finas a livellu natzionale e internatzionale. S'ammentat in su 2000 su prèmiu Label Europeu pro "Pandora", retzitada in limba Frantzesa a su cuncursu "En francais sur les planches" e, in su 2002 , su primu prèmiu pro "Alga" a su festival internatzionale de Spoleto "Arte a scuola", ambos testos sunt de Nigola Salvio, a s'època prèside de su Litzeu.