Tàtari - «Èbola, sa màchina de sos sucursos at funtzionadu». Gasi naraiat s'assessore regionale Arru pro su casu de su virus registradu in Sardigna. A pustis no est però possìbile a cunfirmare custa decraratzione. Est de custas oras, difatis, sa noa de àteros bator dotores e tècnicos de laboratòriu chi sunt istados postos in isulamentu.
Custos paret chi siant istados in cuntatu cun su virus Èbola in su perìodu de su ricoveru de s'infermieri de 37 annos e cooperante tataresu. S'òmine fiat torradu su 6 de maju dae Sierra Leone boghende a campu sos primos sinnales de sa maladia. Paret chi siat una mesura preventiva pro sos operadores sanitàrios matessi.

Sunt deghessete duncas sas pessones chi sunt in isulamentu ca sunt istadas in cuntatu cun s'infermieri diretamente o indiretamente. Deretu b'at àpidu polèmicas pro unu pranu anti Èbola chi paret no apat funtzionadu a sa mègius manera. Pro custa cajone Austinu Sussarellu, cummissàriu de sa Asl, at incumintzadu un'indàgine interna pro averguare si sunt istadas rispetadas totu sas protzeduras.