Tàtari - B'at restos de mortu in intro de sos bàules chi non sunt sigillados e chi totus podent bìdere in su campiusantu monumentale de Tàtari? Sa dimanda la ponet Pietro Serra, presidente de s'assòtziu "Alternativa Futura per l´Italia"
«Dae tempus meda in su campusantu monumentale de Tàtari b'at una càmera aberta a su pùblicu in ue b'at bàules de mortu in linna chi non tenent perunu sigillu. In prus b'at finas bàules minores de zincu cun restos o crematziones sena peruna vigilàntzia». Sa denùntzia est de su rapresentante de Afi chi narat puru: «Sa càmera est bruta meda, non b'at peruna norma igienica fundamentale. Nos dimandamus comente mai nemos pessat a la limpiare e a pustis a la tancare. Est una mancàntzia grave de rispetu a sos mortos e a sos parentes chi ant àpidu unu lutu». Subra de sa chistione Serra narat chi at a fàghere batalla e narat: «Si b'at responsabilidades calicunu nde depet rispòndere e si nde depet iscusare».