Tàtari - «Semus timende pro su litzentziamentu probàbile, giai dae prima die de su mese de trìulas, de 73 dipendentes de sos 152 de sa Multiss. Una situatzione chi, in unu mamentu de crisi de su territòriu, a dolu mannu nos ponet a pessare».Su sìndigu de Tàtari Nigola Sanna cummentat in custa manera sa noa chi est istada publicada in sos giornales e ispainada dae sas organizatziones sindacales territoriales de Filcams Cgil, Fisascat Cisl, Uiltucs, Uilfpl, Css e Ugl Terziario. «In particulare s'annu coladu – ammentat su primu tzitadinu – aiamus dadu sa solidariedade nostra a sos traballadores de sa Multiss chi protestaiant in subra de sa coberta e su palatzu de sa Provìntzia. Una forma de protesta chi los aiat agiudados a otènnere unu impignu dae sa Regione chi aiat garantidu una solutzione de su problema».

«Custu territòriu – ammentat Nigola Sanna – est in suferèntzia manna, si podent ammentare sas situatziones reghentes de sos operajos de sa miniera de s'Ulumedu e de sos dipendentes de su tzentru cummertziale Auchan.Sena ismentigare sa situaztione de sos imprendidores de su tzentru istòricu de Tàtari e de sos dipemndetes issoro.
In palas de cada dipendente, b'at semper una famìlia e su traballu devet èssere amparadu pro garamntire sa dignidade de sas pessones e s'ispera de unu tempus benidore sulenu. damus ìtotu sa solidariedade nostra comente giunta. Isperemus chicusta situatzione si potzat resòlvere e nos auguramus chi sa Regione sustèngiat sa Multiss e sos traballadores suos», at tancadu su primu tzitadinu.

In sa foto: una protesta de sos traballadores