Aristanis - Roberto Atzori de Selàrgius est su binchidore de sa segunda editzione de su cuncursu fotogràficu "Emozioni di Sartiglia". A su cuncursu, abbinadu a sa Sartìglia de Aristanis, sunt istadas ammìntidas sas fotografias a colores tiradas in s'editzione 2015 de sa Sartìglia (Vestitzione, Cursa a s'Isteddu e Cursa de sas Parìllias).

50 sos partetzipantes e 96 sas fotos in cuncursu in custa editzione. A s’Hospitalis Sancti Antoni, sa Fondatzione "Sa Sartiglia" at premiadu sos primos tres classificados chi ant àpidu prèmios pro milli èuros.
Su primu prèmiu l'at àpidu Roberto Atzori chi pro sa fotografia intitulada "Sentidu" at retzidu sa pergamena dae Alessandro Crobu, Componidori in s'ùrtima editzione de sa Sartìglia. Segundu classificadu cun sa fotografia cun su tìtulu “L’impennata” Pinuccio Bua de Orosei e su de tres classificados cun sa fotografia cun su tìtulu “Attraverso il velo de sa Massaia Manna” Marcello Mangroni de Santa Justa.