Casteddu - Sàbadu su 9 de maju si votat pro s' Òrdine de sos giornalistas de sa Sardigna: pro rennoare su cussìgiu regionale devent èssere eletos ses professionistas e tres publitzistas, pro su cullègiu de sos revisores de sos contos duos professionistas e unu publitzista. Pro s'ocasione, in sa sede de carrera de Barone Rossi in Casteddu, b'at a èssere s'assemblea de sos iscritos: a sas 10.00 su presidente Filippo Peretti, chi lassat s'incàrrigu a pustis de tres mandados, at a ammaniare sos sègios e at a abèrrere cun sa relatzione sua su dibàtidu subra de sa riforma de s'Òrdine (in particulare subra de sa novidade de sa formatzione contìnua pro sos iscritos a s'Albu) e subra de s'istadu de sa professione giornalìstica in s'ìsula.
Dae mesudie a sas 8 de sero s'at a votare in custos sègios: in Casteddu in sos locales de s'Òrdine in carrera de Barone Rossi 29; in Tàtari in sos locales de sa Nuova Sardegna in sa zona industriale de Predda Niedda, carrera 30/31, in Nùgoro in sa redatzione de s'Unione sarda, in carrera de Aspromonte n. 5.
At a èssere eletu chie at a otènnere unu nùmeru de preferèntzias prus artu de su 50 pro chentu de sos votantes. Su turnu de ballotàgiu, si b'at a èssere, est programmadu pro sàbadu su 16 de maju, in sas sedes matessi e in sos matessi oràrios.

In sa foto: su presidente Filippo Peretti