Aristanis - Dae lunis 4 de maju a lunis 15 de làmpadas, su tzentru servìtzios culturales Unla de Aristanis ammàniat unu cursu de limba sarda. Su cursu de alfabetizatzione in limba sarda est ammaniadu dae sa Provìntzia de Aristanis, durat vinti oras e at a sighire s'atividade didàtica incumintzada in s'atòngiu de su 2014.
Su cursu tenet comente obietivu su de promòvere s'impreu de sa limba sarda in àmbitu pùblicu, ma est abertu finas a totu sos tzitadinos interessados e faghet parte de su progetu “Limba sarda: limba de s’identidade limba de su mundu” (annualidade 2011), finantziadu dae sa lege 482/1999, e realizadu cun sa Asl de Aristanis e cun sa Càmera de Cummèrtziu de Aristanis.
Pro àteras informatziones si poet mutire s'Ufìtziu de sa Limba e de sa Cultura Sarda, in carrera de Lepanto (ex istitutu Brunelleschi) o telefonende a su nùmeru 0783/036112.