Tàtari - Sos ispàtzios de su mercadu tzìvicu tataresu si sunt aprontende pro collire un'àteru eventu ligadu a sos libros. A pustis de su resurtadu bonu de #ioleggoperchè in ue ant leadu parte pessones meda, su 28 de abrile, pro sa Die de sa Sardigna, est in programa in sa pratza coberta una die in ue s'ant aunire duos pragheres mannos: su de sa letura e su de sa mùsica bona. S'apuntamentu, ammaniadu dae LibraiSardi in rete in collaboratzione cun sa Comuna de Tàtari, s'assessoradu regionale de s'Istrutzione Pùblica e sa presidèntzia de su Cussìgiu regionale de sa Sardigna, si aberit cun su recital de Rita Atzeri “Alimenti, tradimenti”; a sas sete de sero, pro Scrittori a piede Liberos, Giulio Angioni presentat su romanzu nou suo “Sulla faccia della terra”.
A sighire, dae sas 8 de sero, logu a sa mùsica. Su Coro polivocale sardu, sos “Cantadores a chiterra” minores e sos pitzinnos de s'iscola de San Donato de su progetu “Anch’io nel ballo tondo” ant a rapresentare sa mùsica, sa dantza e sa limba sarda a livelllu locale. Su CantaGiro Sardegna at a èssere prus “global” e at a fàghere logu a su cantu identitàriu tataresu. Pro festare Sa Die de sa Sardigna, b'at a èssere su coro “Sant’Austinu” de Alà diretu dae Silvio Bossi, chi at a cantare “Procurad’e moderare”, “Fiore Galanu”, “Non poto reposare”.
A sighire sos "Cantadores a chiterra” cun Matteo Dore de Òsile e Paoletto Senes de Sossu; a sas 20.20 sos protagonistas ant a èssere sos pitzinnos de su grupu de ballu sardu de s’Istitutu comprensivu “San Donato" de Tàtari. Dae sas 20.30 sos artistas de su CantaGiro Sardigna presentant un'ispetàculu in ue limba sarda, italiana e inglesa s'aunint: presentant un repertòriu in limba sarda cun cantos in limba italiana e in limba inglesa. A sas 21.30 artistas e grupos giovaniles de su festival de sa cantzone tataresa "Cantu eu puru" cun cantos in limba italiana e limba inglesa in collaboratzione cun s'assòtziu polisportivu "Athlon".