Sènnaru - Oto chidas, vintichimbe istudentes de sas iscolas mèdias e sos insignantes de s'assòtziu FabLab Tàtari, duas educadoras e un'architetu pro torrare a pensare Sènnaru e a sa manera de bìvere sos ispàtzios urbanos, isfrutende massimamente sas tecnologias digitales. Est su progetu finantziadu dae sa Comuna de Sènnaru, chi interessat sos istudentes de s'iscola mèdia de s'Istitutu cumprensivu de Sènnaru e ammaniadu dae s'assòtziu FabLab Tàtari.
Su programma rapresentat sa prima esperièntzia in Sardigna de laboratòriu didàticu multidisciplinare chi bolet imparare a sos pitzinnos s'impreu de sas tecnologias digitales pro fraigare e torrare a valutare sos ispàtzios urbanos e s'impreu issoro in àmbitu sotziale, favorende s'addòviu e sa cunvivèntzia intre sos abitantes.
In su laboratòriu sos istudentes ant a progetare e realizare tràmite tecnologias digitales noas modellos noos de suportos urbanos comente pro esempru giogos, panchinas e àteros ogetos de arredu urbanu.