Portu Turre - Su grupu de traballu de s' Òrdine de sos giornalistas, costituidu pro coordinare su progetu "Fare il giornale nelle scuole”, at premiadu su giornaleddu “Fuoriclasse”, elaboradu dae sos alunnos de sas classes de su cursu D a tempus prolungadu de s'iscola mèdia Monte Agellu, ca resultat intre sos mègius giornales iscolàsticos pro originalidade e contenudos.
Custa est sa testimonia de su traballu bonu fatu dae sos professores e dae sos alunnos e sa presèntzia finas in su Monte Agellu de eztellèntzias chi mèritant de èssere valorizadas e connotas. Cussa de su giornale est una traditzione giai cunsolidada in s'Istitutu cumprensivu nùmeru 2, giai dae su 1996 cando unu grupu de dotzentes aiat detzisu de fàghere nàschere su periòdicu pro dare boghe a sos alunnos in foras e in intro a sa classe: “pensieri e parole in libertà”.

Sa redatzione est costituida dae sos alunnos de sas classes de su cursu a tempus prolungadu, ma "Fuoriclasse" regollet noas e artìculos chi pertocant atividades, initziativas e progetos ammaniados e realizados dae sos alunnos de totu sas classes de su Plessu de Monte Agellu e de totu s'Istitutu. Su cuncursu a sa de 12 editziones est ammaniadu dae s' Òrdine de sos giornalistas pro sustènnere sas initziativas de sas iscolas italianas pro valorizare s'atividade giornalìstica comente istrumentu de irrichimentu comunicativu e de modernizatzione de su limbàgiu.