S'Alighera - Sa posidònia no est prus unu problema, ma una sienda econòmica e ambientale pro sas comunas e sos agricultores. Lu narat sa Coldiretti Sardigna chi at aprontadu unu progetu de presentare a sas Comunas de sas costeras chi cadannu devent parare fronte a su "problema posidònia", una casta de arga chi costat medas mìgias de èuros pro nch'èssere bogadu dae sas ispiàgias. In prus bogat a campu dìsputas e crìticas ca est unu materiale chi cheret regollidu cun atentu mannu e tècnica ca si nono s'arriscat de cajonare dannos ecològicos e guastare sas ispiàgias.
Coldiretti Sardigna at istudiadu cun sa collaboratzione de s'Universidade de sos Istùdios de Tàtari e de “Sardegna Ricerche”, àteras solutziones ecologicamente ed economicamente cumpatìbiles chi prevident de torrare a impreare sa massa vegetale in suvrabundàntzia. Si tratat de unu sistema de regorta e de gestione de sos resìduos de s'ispiàgia e s'impreu issoro pro usos agrìculos. Si podet impreare comente substratu de coltivatzione e comente fertilizante. O si nono si podet ritziclare comente letiera pro animales, cun vantàgios finas dae unu puntu de vista sanitàriu. Si tratat de solutziones alternativas virtuosas dae unu puntu de vista econòmicu e ambientale, chi diant pòdere èssere fatas dae sas cooperativas afiliadas “UEcoop”, chi tenent sa professionalidade pro sa regorta (e pro custu est istada brevetada una màchina), sa gestione de sos resìduos de s'ispiàgia e s'impreu nou pro usos agrìculos.