Mamujada - Sa die de s'inauguratzione de sa de 49 editziones de “Vinitaly2015”, sa “Cantina Sedilesu” de Mamujada at leadu s'onorefitzièntzia de Benemèritu de sa Vitivinicoltura Italiana 2015 cun sa Medàllia de Cangrande.
Su prèmiu est istadu dadu in sa tzerimònia traditzionale chi b'at àpidu in s'“Auditorium Verdi-Centro Congressi Palaexpo” de Verona, e bi fiat finas s'Assessora regionale de s'’Agricoltura Elisabetta Falchi e su Ministru de sas Polìticas agrìculas e alimentares e forestales Maurizio Martina.
Istituidu in su 1973, su reconnoschimentu benit dadu cadannu a chie s'est distintu in sa regione sua «pro àere ischidu promòvere e valorizare sa cultura vitivinìcula». «S'issèberu ocannu est istadu pro sa cantina Sedilesu pro calidade arta de su vinu Cannonau produidu dae s'azienda, pro su traballu fatu in su territòriu e pro sas capatzidades imprenditoriales mustradas - at ispiegadu s'assessora de sa Giunta Pìgliaru, durante sa tzerimònia. Custa est una produtzione biològica e biodinàmica - at naradu - chi at iscummìtidu mescamente subra de s'innovatzione e subra de su rispetu de s'ambiente».

Sa sede de sa Cantina Sedilesu est in su tzentru de Mamujada, est fraigada in pedra, ammentat sos Nuraghes, cun materiales tzertificados comente “edilìtzia biològica” e tenet finas s' impiantu fotovoltàicu.

In sa foto (Veronafiere-Ennevi): sa cunsigna de su prèmiu a Emilio Mulargiu