S'Alighera - Sa Regione Sardigna at cunfirmadu su contributu finantziàriu pro sa tapa de su Rally Mundiale de automobilismu Itàlia - Sardigna 2015. L'at detzisu s'àtera die sa Giunta a pustis de sa proposta de s'assessore de su Turismu, Frantziscu Morandi, chi at pretzisadu chi no ant a èssere superados 900 mìgia èuros erogados pro s'ùrtima editzione.
A sa fine paret chi apat bintu s'assignatzione direta, mancari chi in sas ùrtimas chidas su matessi assessore apat ipotizadu sa publicatzione de unu bandu.
A su mancu ocannu sa Riviera de su coraddu podet galu cantare vitòria subra de sa Gaddura chi imbetzes aiat ospitadu sa manifestatzione giai dae su cumintzu in s'ìsula. Su contributu econòmicu e sa cuncurrèntzia intre s'Alighera e Terranoa comente sede de sa manifestatzione sunt istadas a su tzentru de polèmicas polìticas in custas ùrtimas chidas. Isetende su binchidore dae sas pistas, pro como at bintu su Rally.

In sa foto: Frantziscu Morandi, assessore regionale de su Turismu