Casteddu - Paràula de òrdine: cumbàtere su virus de sa limba blu vatzinende su bestiàmene. In su 2014, sa campagna de vatzinatzione detzisa dae sa Regione Autònoma de Sardigna at dadu resurtados de importu in cunfrontu a su tempus coladu. Sunt vintiunu sos logos impestados e trèighi berbeghes mortas.
S'istrategia de profilassi, duncas, cheret torrada a fàghere finas in su 2015. Sa Giunta Regionale, a pustis de sa proposta de s'assessore a sa Sanidade Luigi Arru, at aprovadu su Pranu de vatzinatzione contra a su "sierotipu 1" de sa calentura catarrale de sos ovinos. Ant a èssere vatzinadas totu sas berbeghes (prus de 3 milliones) e totu sos bovinos (pagu prus o mancu 270 mìgia).

Sa mesura de profilassi podet èssere ispartzinada finas a sas cabras, ma sa Regione isetat su pronuntziamentu de su Ministeru de sa Salude. Sas vatinatziones ant a dèvere èssere agabbadas màssimu intro de su mese de austu. Sa Asl de Tàtari est cunfirmada cabufila pro fàghere una protzedura aberta, cun valèntzia regionale, pro sa fornidura de sa cantidade de vatzinos netzessàrios. Sas Asl tenent un'iscorta de 2 milliones e 296 mìgias vatzinos. A dolu mannu mancant galu unu millione e 770 mìgia doses.