Biddacidru - Novidades in intro de su cussìgiu diretivu de sa Fundatzione Giusepe Dessì, s'ente cun base in Biddacidru (Mèdiu Campidanu) intituladu a s'iscritore sardu e impignadu in s'istùdiu, sa documentatzione e sa valorizatzione de s'òpera sua, e finas in s'organizatzione de su prèmiu literàriu omònimu (ocannu est giai sa de 30 editziones).
Sunt tres sos nùmenes fatos dae s'assessora regionale Clàudia Firino: cunfirmada Maria Carmela Aru, numenada dae sa giunta regionale betza, sunt imbetzes nùmenes noos Pàulu Lusci, chi est istadu responsàbile editoriale de s'azienda editora Aisara e Frantzisca Piras, mastra de s'iscola primària de Biddacidru ativa meda in sas atividades culturales de su territòriu.Su cussìgiu diretivu - sos àteros membros sunt Giannina Orrù (bitzepresidente), Frantziscu Dessì, Teresa Maria Pani e Mauro Pittau (segretàriu generale) - at a pustis agatadu su presidente nou, Christian Balloi: cussigieri comunale in Biddacidru, laureadu in sièntzias polìticas e giornalista publitzista, connòschidu in sos ambientes isportivos, intrat a su postu de Giosepe Marras a cabu de sa Fundatzione Giosepe Dessì.