Tàtari - Torrat s'apuntamentu cun sa rassigna de produtziones originales “JazzOp”, organizada dae s'Assòtziu Blue Note Orchestra (Abno), chi ocannu at a presentare tres produtziones originales. At a incumintzare su 14 de abrile cun s'ispetàculu “Flamenco Big Band” de su sassofonista e composidore Perico Sambeat e at a sighire su 26 de maju cun “Lapses of Silence (The Art of American Song)” de Luigi Giannatempo, unu progetu cun mùsicas de Samuel Barber, Leonard Bernstein, Aaron Copland e Charles Ives cun Marta Caviglia. Su tziclu at a agabbare su 21 de làmpadas cou “Jazz a Cinecittà”, iscritu e diretu dae Marco Tiso.
Sa de dòighi editziones de sa rassigna però, no at a èssere s'ocasione pro presentare sas produtziones noas de s'Abno ebbia, ma finas sa manera ideale pro tzelebrare sos 25 annos de atividade de s'Orchèstra Jazz de sa Sardigna.
Custa editzione noa “JazzOp” est organizada cun su contributu de s'Assessoradu a sas Culturas de sa Comuna de Tàtari, de sa Regione Sardigna, de su Ministeru de sos Benes Culturales e de sa Fundatzione Bancu de Sardigna, in collaboratzione cun s'Assòtziu Triatatà e su Cineclub Sassari. Sos primos duos cuntzertos ant a èssere in su Teatru Comunale de Tàtari, mentres s'ùrtimu in su Parcu de Monserratu e giai dae como at a èssere possìbile comporare sos billetes solos o sos abonamentos.

In sa foto: orchèstra de "Jazz a Cinecittà"