Tàtari - Sàbadu su 28 de freàrgiu su Dipartimentu de Istòria, Sièntzias de s'òmine e de sa formatzione de s'Universidade de Tàtari at organizadu sa fase de seletzione regionale de sas olimpiades de Filosofia.
Ant leadu parte medas istitutos iscolàsticos de Tàtari, Casteddu, Bosa, Biddaxidru, Tèmpiu.
Sas Olimpiades sunt un'initziativa promòvida dae su Ministeru de s'Istrutzione, universidade e chirca, cun sa Sotziedade filosòfica italiana (SFI) e est indiritzada a sos istudentes de sas iscolas superiores. In Sardigna s'initziativa est organizada dae sa Setzione Universitària de Tàtari de sa SFI cun sede in su Dipartimentu de Istòria. Sa cumpetitzione est ispartzida in duos canales: unu cun provas in limba italiana, s'àteru cun provas in limba istràngia. Sas seletziones prevident una prova iscrita chi pertocat s'iscritura de unu sàgiu de argumentu filosòficu.
Sos binchidores ant a leare parte a sa fase natzionale chi s'at a fàghere in Roma su 25 e su 26 de martzu in su MIUR. Sos binchidores de sa fase natzionale de su canale de limba istràngia ant a leare parte a su de 23 International Philosophy Olympiad, chi s'at a fàghere dae su 14 a su 18 de maju in Tartu, in Estònia.