S'Alighera - Un'òmine est istadu agatadu mortu custu mangianu (domìniga) in sa barca sua ormegiada in su molu de su portu de Fertìlia. Originàriu de Rocourt in Bèlgiu, s'òmine de 40 annos Alex Jules Lannoy, fiat dae carchi die in vacàntzia in sa Riviera de su Coraddu cun carchi amigu.
S'allarme est istadu dadu a mangianu dae sa cumpàngia. Sos duos ant coladu sa note in barca a pustis de àere chenadu in fora.
Dae sas prima indàgines sa morte paret chi siat istada cajonada dae càusas naturales ma su magistradu de turnu at ordinadu s'autopsia su matessi. Inùtiles sos tentativos de lu torrare in èssere dae parte de su 118. Intervènnidos finas sos carabineris e sa Capitaneria de Portu.

In sa foto: òmines de sa Capitaneria in Fertìlia