Tàtari - Su cummissàriu istrordinàriu de sa Asl de Tàtari Austinu Sussarellu at numenadu sos diretores sanitàriu e amministrativu noos chi l'ant a acumpangiare in su perìodu de cummissariamentu de s'Azienda Sanitària Locale n.1.
In cust'ocasione, su cummissàriu at torradu gràtzias a sos diretores sanitàriu e amministrativu betzos, Cesarino Onnis e Chiara Seazzu, pro su contributu de importu dadu a s'Azienda dae su 2012 a oe e pro sa collaboratzione importante garantida in custu primu mese de cummissariamentu.

A sa Diretzione Sanitària est istada numenada Serenella Zedda, dipendente de sa Asl de Tàtari dae su 1986.
Laureada i Meighina e Chirurgia in s'Universidade de sos Istùdios de Tàtari, est ispetzializada in Igiene Meighina preventiva cun orientamentu in Sanidade Pùblica. A pustis de àere traballadu in su Servìtziu de Igiene Pùblica de s'Azienda Sanitària, dae su 2001 at ghiadu su Distretu de s'Alighera, in antis comente responsàbile a pustis comente diretora.
Su diretore amministrativu nou est Andria Marras, in sa Asl de Tàtari dae su 1990. Laureadu in Giurisprudèntzia, finas a oe at àpidu s'incàrrigu de diretore de su Servìtziu Amministrativu de sos Presìdios Ispidalieris. Dae su 2004 a su 2006 est istadu dirigente amministrativu de sa Asl de Terranoa comente incarrigadu pro sos Distretos de Terranoa e Tèmpiu, a pustis, torradu in orgànicu in sa Asl de Tàtari, s'est ocupadu de sas relatziones sindacales in sa Diretzione Generale e a pustis de sos Servìtzios amministrativos territoriales. Dae su mese de austu de su 2010 a su mese de trìulas de su 2014, est istadu responsàbile de su Servìtziu Afàres legales.

In sa foto: su cummissàriu istraordinàriu de sa Asl de Tàtari Austinu Sussarellu