Casteddu - «Est arribadu su mamentu chi cadaunu si leet sas responsabilidades suas. Sa Regione at fatu sa parte sua eroghende s'istantziamentu intreu de 41291 èuros chi deviat a sas Provìntzias pro garantire su deretu a s'istùdiu de sos istudentes disàbiles in tempos prus lestros cunforma a su tempus coladu, est a nàrrere in cointzidèntzia cun s'incumintzu de s'annu iscolàsticu».

At rispostu gosi s'assessora regionale de s'Istrutzione Pùblica Clàudia Firino a sa Cgil pro su chi pertocat sa chistione de sos istudentes disàbiles. «Est importante a nàrrere chi custu servìtziu est cofinantziadu dae Provìntzias e Regione. In Tàtari su dinare est agabbadu ca, ispesu totu su finantziamentu regionale, est mancadu de su totu su contributu finantziàriu de sa Provìntzia. Difatis sas àteras Provìntzias garantint, mancari intre milli dificultades, sa continuidade de su servìtziu e non càpitat su chi càpitat in Tàtari».

«Naradu custu - sighit - pro dare un'informatzione cumpreta, sigomente sa tutela de su deretu a s'istùdiu de sos istudentes cun disabilidade m'interessat a manera particulare e torrende a nàrrere s'ausèntzia de responsabilidade de sa regione in custa istòria lègia, amus agatadu una prima solutzione pro risòlvere su problema eroghende deretu, tràmite s'Assessoradu regionale de sos Entes Locales, sos 2/12 de su Fundu ùnicu. In prus amus a propònnere un'emendamentu a sa Finantziària in discussione dae sa chida chi intrat in Cussìgiu Regionale cun s'idea de garantire a totu sos istudentes disàbiles s'assistèntzia e su trasportu», at agabbadu s'assessora Firino sutalineende chi sa Giunta regionale at propostu, in sa finantziària imbeniente, unu millione in prus pro sos istudentes disàbiles.

In sa foto: s'assessora regionale Clàudia Firino