Tàtari - S'assòtziu Angsa Sassari Onlus espressat indignatzione, fastìgiu e istrachidùmene pro sa suspensione de s'assistèntzia educativa a sos istudentes disàbiles in sas iscolas superiores de Tàtari e de su servìtziu trasportu de sos pitzinnos de sa Provìntzia.
Su chi si timiat e chi est istadu naradu medas bortas est capitadu ca medas famìlias dae su 22 de ghennàrgiu no ant mandadu a iscola sos fìgios issoro. Sunt 132 istudentes cun disabilidade e 77 chi benint dae medas biddas de sa provìntzia tataresa. Una situatzione pesante chi at a gravare subra de sas famìlias e subra de sos 60 traballadores chi no ant àpidu galu risposta a sas rechestas issoro.
Sa Provìntzia de Tàtari at suspesu su servìtziu pro mancàntzia de resursas a pustis de àere dadu s'allarme in custos ùrtimos meses. Dae sa Regione no est arribada peruna solutzione e sas impromintas sunt abarradas sena risposta. «Mudìmene chi ofendet sa dignidade e sa passèntzia de sas famìlias. Faghimus un'apellu a su bonu sensu, a sa sensibilidade e a s'intelligèntzia de sas pessones chi nos guvernant in Regione e a sa classe polìtica intrea pro chi potzat garantire su deretu fundamentale a s'istrutzione a sos 132 pitzinnos. E faghimus un'apellu a manera dereta a su presidente de sa Regione Frantziscu Pìgliaru a manera chi si fatzat càrrigu de custu problema».