Tàtari - Una disgràtzia improvisa est capitada a una famìlia de giòvanos tataresos. Unu pitzinneddu de degheoto meses l'ant agatadu mortu in sa culla, in una domo in localidade Filigheddu.
Forsis unu bòmbitu in su sonnu at cajonadu sa morte de unu pitzinneddu de 18 meses. Segundu su chi riferit sa Nuova Sardegna, s'iscoberta est istada fata lunis a mangianu dae sa mama chi, comente cada die, est andada a ischidare sos duos fìgios (s'àtera tenet bator annos). In dae in antis a su corpus de su fìgiu, sa fèmina at chircadu s'agiudu de su maridu e at cuntatadu sa tzentrale operativa de su 118.
Sa còpia at chircadu de fàghere sas manovras de rianimatzione naradas in su telèfonu dae s'operadore isetende s'autoambulàntzia. Cando sunt arribados sos sucursos non b'aiat prus nudda ite fàghere mancari sos dotores apant chircadu pro belle un'ora de rianimare su pitzinneddu. In su logu finas sos carabineris, un'atu de dovere in custos casos, comente sa comunicatzione a su magistradu de turnu de sa Procura de sa Repùblica. Sos atzertamentos dispostos dae su magistradu ant cunfirmadu chi s'est tratadu de morte naturale.