Tàtari - Àera de cunvocatzione in Natzionale in su 2015 pro bator artzieris sardos o chi mìlitant in sotziedades isulanas. Su Cussìgiu Federale de sa Fitarco at difatis ufitzializadu s'elencu de sos atletas chi tenent sos recuisidos, o inditados dae sa valutatzione tècnica, pro fàghere parte de medas seletziones italianas o de grupos de traballu de interessu olìmpicu pro s'annu imbeniente.

Sa Torres Tàtari est forte meda ca tenet tres cunvocados. Difatis, Viviana Spano est istada posta siat in su grupu de tiru a sa targa indoor siat in cussu de tiru de campagna pro su chi pertocat s'arcu compound, mentres in s'arcu nudu ant a èssere duos sos rapresentantes tataresos, Amanda Colaianni e su torresino nou Eric Esposito, finas issos in sos grupos de tiru de campagna. Su de bator alfieris targadu bator moros est Fàbio Ibba de sos Artzieris Uras, chi faghet parte de su grupu de tiru de campagna in s'arcu compound.
Giai dae su mese chi intrat, sos bator artzieris ant a leare parte paris a sos àteros cunvocados a su programma de atividade federale chi previdet unu tantu de addòvios periòdicos e borta pro borta sos tècnicos federales ant a leare dae custos grupos pro cumpònnere sas iscuadras chi ant a partetzipare a sas garas internationales. Pro Spano est sa prima bia in totu sos sensos cun s'atentzione de sos tècnicos natzionales, mentres Ibba at giai vestidu sa màllia biaita in s'iscuadra juniores.

In sa foto: Viviana Spano