Tàtari - Sos assòtzios de sos istudentes Udu Tàtari (Unione de sos Universitàrios), Asso (Assòtziu Istudentes Tataresos Organizados), Css (Colletivu Isteìudentes Tàtari) e totu sos istudentes de sa Provìntzia de Tàtari, ant a partetzipare su 12 de nadale in Tàtari a s'isciòperu generale natzionale proclamadu dae Cgil e Uil. «Semus contra a su “Jobs Act” e a “La Buona Scuola” de su guvernu Renzi – ant ispiegadu sos rapresentantes de sos duos sindacados - sos deretos, sas tutelas e sa dignidade de sos traballadores e de sos istudentes non si podent cuntratare. Non creimus chi custos provedimentos ant a fàghere bene a su sistema econòmicu-sotziale, ma chi l'ant a giùghere a una retzessione semper prus negativa».
Una protesta contra a su disinnu de su guvernu in matèria, contra a sos finantziamentos pùblicos a sas iscolas privadas, contra a sos finantziamentos dae parte de sos privados a s'iscola pùblica e contra a sa chistione de sa governance, sos chi ant a iscioperare pedint sustènnios finantziàrios pro s'iscola, s'universidade e sa chirca e chi siat tratadu su tema de su deretu a s'istùdiu e de sa rapresentàntzia istudentesca. «Pedimus resursas addatas pro garantire s'assistèntzia a sos disàbiles - ant naradu - pedimus unu pianu istraordinàriu pro s'edilìtzia iscolàstica, pedimus chi non bi siant prus idòneos non benefitziàrios de bursas de istùdiu, dende in custa manera sa possibilidade a sos giòvanos prus pòveros de istudiare. Pedimus sa valorizatzione de s'iscola».



In sa foto: una manifestatzione istudentesca