Tàtari - Mantènnere biu e firmu su ligàmene intre Tàtari e su raportu astrintu antigu e famadu. Cun custa motivatzione sa Fundatzione Torres at detzìdidu de pònnere una targa de ammentu in sa parada de su palatzu de su gùturu Bertolinis, in su tzentru istòricu de sa tzitade, in ue si sunt addoviados pro sa prima bia sos babbos fundadores de sa sotziedade "rossoblu".

Sos istùdios fatos e sa literadura disponìbile subra de custu argumentu contant de unu grùstiu de giòvanos apassionados e animosos chi in su mese de abrile de su 1903 si sunt addoviados in sos locales de cussu istàbile, a s'època de propiedade de sa famìlia Satta Branca e ant fundadu sa Sef Torres. Sa tzerimònia pro pònnere sa targa de ammentu in su logu de nàschida de sa Sotziedade educatzione fìsica Torres est programmada pro sàbadu su 6 de nadale a sas 11 in su gùturu Bertolinis.
Paris cun sos cabos e sos sòtzios de sa Fundatzione Torres ant a partetzipare a s'eventu su sìndigu de Tàtari Nicola Sanna, su presidente de sa Torres Domènico Capitani e sos pitzinnos de su setore giovanile. Sa targa est istada beneita dae s'artzipìscamu de Tàtari, Pàulu Atzei.