Tàtari - Tàtari in sa classìfica de sas chimbe tzitades cun su clima mègius. No est un'imbentu publitzitàriu, chi imbetzes si deviat fàghere dae tempus pro fàghere arribare turistas, ma su resurtadu de una chirca subra de su raportu intre cunditziones atmosfèricas e felitzidade publicada dae sa rivista Weatherwise e pubblicada in Itàlia in su Corriere della Sera.

Su tzentru turritanu s'est collocadu in su de bator postos. In antis b'at Vina del Mar (Tzile,), Las Palmas (Gran Canària) e Nordovest de su Marocu, mentres a pustis de Tàtari bi sunt Bartzellona, Lisbona, San Diego, Adelàide, Città del Capo e su sud estremu de s'Austràlia. Duncas, a livellu climàticu e pro como setzi pro custu, Tàtari, pro esempru, est mègius de sa Califòrnia. Sos fatores pro fàghere custa classìfica sunt medas.
Intre custos sa temperadura, umididade e dies de sole. Su clima, duncas, paret chi potzat conditzionare segundu custa chirca sa chìmica de su corpus e morale, cunditzionende duncas s'umore generale de sas pessones. In cale si siat parte de su mundu una noa de custu gènere, sos amministradores e sos imprendidores de su logu fortunadu la diant àere impreada pro vèndere su territòriu de riferimentu e fàghere unu pranu interessante de tècnicas de mercadu, amus a bìdere si in Tàtari nd'ant a èssere capassos.