Tàtari - Sa Cunventzione de Istanbul, ratificada dae s'Itàlia in su mese de maju de su 2013, reconnoschet sa preventzione comente prima mesura pro promòvere su cambiamentu in sos cumportamentos chi cajonant sa violèntzia subra de sas fèminas, sas pitzinnas e sas pitzinneddas.
Pònnere aficu in su tempus benidore est duncas s'imperativu chi si devet sighire. Incumintzende dae sas iscolas e traballende subra de sos programmas iscolàsticos ponende oras de educatzione a sa paridade de gènere.
Su caminu podet èssere eficàtze a manera particulare e podet produire cambiamentos lestros e de importu si benit fatu subra de pitzinnos e pitzinnas chi no ant galu istruturadu in sa mente issoro ideas e istereòtipos chi giustìficant sa violèntzia subra de sas fèminas, est a nàrrere in antis de s'adolescèntzia, intre sos 11 e sos 14 annos. Lu mustrant sos datos de unu cuestionàriu dadu in un'iscola mèdia de Milanu s'annu coladu, in s'àmbitu de sa campagna InDifesa (nàschida dae sa collaboratzione intre sa Ong Terres des Hommes e su tzentru Sucursu Rosa de s'ospidale san Carlo). Subra de 250 istudentes (mascros e fèminas in sa matessi mesura) prus de 17% pessat chi "un'òmine non tratat male sena motivu, sa fèmina at fatu de seguru carchi cosa pro lu cajonare". Non setzi custu.
Pro belle su 54%, sa violèntzia in domo est su resurtadu de una pèrdida momentànea de su controllu. Su 20% est cumbintu chi sa violèntzia in intro de una còpia est una cosa privada e sas àteras pessones non si diant dèvere intromìtere. Istereòtipos ("si l'at chircada"), giustificatziones ("est istadu unu raptus, sa gelosia"), cualuncuismu ("sunt fatos issoro") chi nde faghent unu cuadru lègiu. Mancari gasi su cuadru est cambiadu a manera radicale a s'agabbu de su caminu educativu fatu gràtzias a sa campagna InDifesa, chi previdiat addòvios cun istudentes, insignantes e genitores pro imparare su rispetu intre òmines e fèminas e sa possibilidade de risòlvere sos cunflitos a manera non violenta. Chi s'istrumentu educativu siat unu de sos mèdios fundamentales pro cuntrastare su fenòmenu de sa violèntzia de gènere est sutaliniadu finas in su protocollu Anci - Di.R.e (Fèminas in Rete contra a sa violèntzia, una rete/network chi aunit prus de 60 tzentros antiviolèntzia in Itàlia), e sa Comuna de Tàtari at aderidu a manera formale s'11 de làmpadas de su 2013.
In su protocollu si faeddat de programmas de informatzione e de sensibilizatzione subra de su tema e de s'interessamentu de sos istitutos iscolàsticos de cada òrdne e gradu in cullegamentu cun sos tzentros antiviolèntzia pro un'Amministratzione comente cussa de Tàtari, chi vantat s'esperièntzia de unu progetu antiviolèntzia de importu comente su Progetu Aurora -sutalìniant dae s'assòtziu noiDonne 2005 - cussu de sa preventzione in favore de sas classes de edade prus giòvanas podet èssere unu terrinu in ue si podent isperimentare mesuras noas. Est una chistione de dinare, de seguru, ma finas de voluntade e de càmbiu de prospetiva.