Nùgoro - Su cursu de formatzione subra de "Giornalismo criminalità", in programma pro chenàbura su 28 de santandria in Nùgoro, at a èssere in onore de Angelinu De Murtas, unu de sos giornalistas professionistas sardos prus antzianos chi in su 1967 at fatu un'intervista istòrica a su bandidu Gratzianu Mesina. Sa figura de su giornalista at a èssere ammentada dae su presidente de s'Òrdine Filippo Peretti.
Reladore de su cursu est su colonnellu Vincenzo Bono, espertu mannu de sos fenòmenos noos de criminalidade in s'ìsula. A pustis b'ant a èssere sas relatziones de duos giornalistas, Austinu Mùrgia e Frantziscu Mariani.
Sunt galu abertas sas iscritziones in su sistema Sigef, ma at a èssere possìbile a si registrare finas in sa sede de su cursu. Sa sede est istada cambiada: sos traballos, dae sas 2 a sas 5 de borta de die, non s'ant a fàghere in sa Comuna ma in sa sala cunsiliare de sa Càmera de cummèrtziu, in carrera de Papandrea 8.

In sa foto: su presidente de s'Òrdine, Filippo Peretti