Tàtari - Est istada una serada forte e emotzionante cussa àpida in sa galleria de su tzentru Cummertziale Luna & Sole de Tàtari chi at ospitadu sa finale regionale de su cuncursu natzionale “Il + Bello d’Italia”.
A s'eventu b'at àpidu pùblicu meda e una giuria at postu sa corona a su binchidore Giosepe Giordo, 22 annos, peritu mecànicu tataresu.

Su cuncursu natzionale est arribadu a manera ufitziale in s'ìsula pro su segundu annu cunsecutivu gràtzias a s'ùnicu agente regionale Augusto Contini, dae medas annos protagonista in su panorama de s'ispetàculu sardu.
Giosepe at a intrare de deretu a sa finalissima natzionale chi at a èssere s'8 de nadale in su
Teatru Itàlia in Roma Capitale, rapresentende in custa manera s'ìsula bella nostra. Cun isse ant a volare finas su segundu classificadu Daniele Pappani de Sossu, Vitòriu Sanna e Luigi Argiolas de Tàtari arribados cun su matessi mèritu a su de tres postos. Ma no ant a èssere sos ùnicos a rapresentare sa Sardigna, ant a èssere presentes finas àteros pitzinnos chi ant bintu sas tapas pretzedentes a sa finale regionale. Maurìtziu Zolesi at presentadu sa serada alternende sas intradas in passerella de una deghina de cuncurrentes chi ant gherradu pro su tìtulu regionale. S'eventu est istadu trasmìtidu in direta dae Telegì (sa Televisione de Tàtari) chi at dadu paris cun s'iscuadra sua unu sustegnu mannu pro fàghere resèssere s'eventu e su cuncursu. S'apuntamentu como est pro sa fase finale in Roma in ue sos sardos giòvanos ant a chircare de cuncùrrere pro su tìtulu natzionale in mesus a prus de chentu pitzinnos chi benint dae totu sa penìsula.


In sa foto (a manca) Giosepe Giordo