Tàtari - In ocasione de su mese de sensibilizatzione contra a su tumore de su purmone, s'assòtziu “Walce Onlus, Donne Contro il Tumore del Polmone in Europa”, promovet in su territòriu natzionale unu programma itinerante de laboratòrios de trucu, cun s'obietivu de agiudare sas fèminas chi tenent neoplasias a iscaretzire mègius sas terapias. At a leare parte a s'initziativa finas sa tzitade de Tàtari, in ue lunis su 17 de santandria, in s'Azienda Ospidaliera Universitària (AOU) de Tàtari, b'at a èssere unu laboratòriu chi imparat a sas fèminas cun tumore a istare mègius cun su trucu in cara.
In particulare, sos laboratòrios de trucu ant a èssere riservados a sas fèminas de totu sas edades chi apant fatu curas oncològicas chemioteràpicas, radioteràpicas o cun fàrmacos biològicos, ispartzidas in grupos de 8-10, in ue espertos de trucu, imbiados dae sa
“Walce”, ant a dare cussìgios pràticos pro mirare sa cara e pro unu trucu addatu a cada situatzione. «Est un'esperièntzia – narant sos organizadores - chi at a permìtere a sas partetzipantes, in unu mamentu de debilesa e de paga seguresa, a torrare a leare unu pagu de sa femminilidade issoro».

A borta de die in prus, a sos malaidos oncològicos, a sos familiares issoro e a totu sos interessados, at a èssere dada finas un'ocasione de cunfrontu cun unu dotore espertu in custa matèria, e a custu s'ant a pòdere fàghere dimandas subra de sa neoplasia de su purmone, subra de sa diagnòstica e subra de àteros temas ligados. S'initziativa faghet parte de su progetu "Pro nde ischire de prus", unu programma informativu chi pertocat s'educatzione a ue at aderidu su dotore Carlo Putzu de su Servìtziu de Oncologia de sa AOU de Tàtari, cun sa collaboratzione de sa Dotora Antonella Arru. "Pro nde ischire de prus" duncas, at a incumintzare dae sas 3 de borta de die in s'àula didàtica in su pranu terra de su padillione nou de maladias infetivas de Arburada Santu Pedru.